ကိုယ်ဝန်ဆောင်ချိန် အဓိက စားပေးသင့်တဲ့ အစားအစာက
ကိုယ်ဝန်ဆောင်ချိန်မှာ ကလေးရော မိခင်ပါ ကျန်းမာစေဖို့ အစားအသောက်ကို သေချာလေး ဂရုစိုင်ဖို့ လိုပါမယ်။ သေချာ ကျက်အောင် ချက်မထားတဲ့ အသားတွေ၊ ပိုးသတ်မထားတဲ့ နို့နဲ့ နို့ထွက်ပစ္စည်းတွေ၊ ပြဒါး ပါဝင်မှု များတဲ့ ငါးတွေက ကိုယ်ဝန်ဆောင်မိခင်နဲ့ မသင့်တော်သလို ကဖင်းနဲ့ အယ်လ်ကိုဟောပါတဲ့ သောက်စရာတွေကလည်း ကိုယ်ဝန်ဆောင်ချိန်မှာ မသောက်သုံးသင့်တဲ့ အရာတွေပါ။
ကိုယ်ဝန်ဆောင်ချိန်မှာ ဒါတွေ မစားသင့်ဘူးဆိုတော့ အသီးအရွက်တွေကိုရော စားပေးသင့်လားဆိုတာကို သိချင်နေပြီလား။ ဒါဆိုရင်တော့ ကိုယ်ဝန်ဆောင်ချိန်မှာ အသီးအရွက် စားပေးတာက ကောင်းလား။ မကောင်းဘူးလားဆိုတာကို ပြောပြပေးသွားပါမယ်။ ကိုယ်ဝန်ဆောင်ချိန်မှာ အစိမ်းရောင် အသီးအရွက် များများစားပေးတာက ကျန်းမာစေမလားဆိုရင် အဖြေကတော့ Yes ပါ။ ဘာကြောင့် ဒီလိုပြောရတာလဲဆိုတော့
- အမျှင်ဓာတ် ကြွယ်ဝစွာ ရရှိစေလို့
ကိုယ်ဝန်ဆောင်ချိန်မှာ အမျှင်ဓာတ် ပြည့်ဝဖို့ကလည်း အရေးပါပါတယ်။ အကြောင်းကတော့ ကိုယ်ဝန်ဆောင် ချိန်မှာ ကိုယ်တွင်းဟော်မုန်း ပြောင်းလဲမှုတွေကြောင့် အစာခြေစနစ်က ကြွက်သားတွေ လှုပ်ရှားမှု နည်းသွားပြီး အစာကျေချက်နိုင်စွမ်း နည်းသွားတာကြောင့် ဝမ်းချုပ်တာ၊ လေပွတာ၊ ရင်ပူတာတွေကိ ခံစားရနိုင်ပါတယ်။ ဒီပြဿနာတွေကို ပြေလည်ဖို့ဆိုရင် နေ့စဉ် စားသုံးမှုမှာ အမျှင်ဓာတ် ပြည့်ဝစွာ ပါဝင်ဖို့ လိုပါမယ်။ ဒါကြောင့် ကိုယ်ဝန်ဆောင်မေမေတို့အနေနဲ့ တစ်နေ့တာမှာ အမျှင်ဓာတ် ၂၈ ဂရမ်ပါအောင် စားပေးလို့ လိုပါမယ်။
- ဖောလိတ်ကြွယ်ဝလို့
ဖောလစ်အက်ဆစ်လို့ သိကြတဲ့ဖောလိတ်က ကိုယ်ဝန်ဆောင်ချိန်မှာ မိခင်ရော ကလေးပါ ကျန်းမာစေဖို့ အရေးကြီးပါတယ်။ ကလေးကို အာရုံကြောနဲ့ ဦးနှောက်ပိုင်းဆိုင်ရာ ကောင်းစွာ ဖွံ့ဖြိုးစေဖို့ ထောက်ကူပေးသလို မွေးရာပါ ချို့ယွင်းချက် ပါမလာစေဖို့လည်း ထောက်ကူပေးပါတယ်။ ဒါကြောင့် ကိုယ်ဝန်ဆောင်ချိန်မှာ ဖောလိတ် ပြည့်ဝစေဖို့ အစိမ်းရောင် ဟင်းသီးဟင်းရွက်တွေ ဖြစ်ကြတဲ့ ကိုက်လန်၊ လိမ္မော်သီး၊ ပဲအမျိုးမျိုး စတာတွေကို စားပေးလို့ ရပါတယ်။
- Lutein ကြွယ်ဝလို့
ကလေးရဲ့ ဦးနှောက်ဖွံ့ဖြိုးမှု ကောင်းစေဖို့နဲ့ မှတ်မိနိုင်စွမ်း၊ သင်ယူနိုင်စွမ်း ကောင်းစေဖို့၊ ဘာသာစကားစွမ်းရည် ကောင်းစေဖို့အတွက် အရေးပါတဲ့ အာဟာရဓာတ် တစ်ခုက Lutein ပါ။ ဒီအာဟာရဓာတ် ပြည့်ဝစေဖို့ဆိုရင် အစိမ်းရောင်ရှိတဲ့ ဟင်းသီးဟင်းရွက်တွေနဲ့ လိမ္မော်ရောင်နဲ့ အဝါရောင်ရှိတဲ့ ဟင်းသီးဟင်းရွက်တွေကို စားသုံးမိဖို့ လိုပါမယ်။ ကိုယ်ဝန်ဆောင်ချိန်မှာ lutein ပြည့်ဝစေဖို့ ကိုက်လန်၊ ထောပတ်သီး၊ မုန်လာဥနီစတာတွေကို စားသုံးပေးလို့ ရပါတယ်။
- Choline ပြည့်ဝလို့
Choline က ကိုယ်ဝန်ဆောင်ချိန်မှာ မရှိမဖြစ် လိုအပ်တဲ့ အာဟာရဓာတ်ပါ။ ကလေးရဲ့ အင်္ဂါအစိတ်အပိုင်းတွေ ဖွံ့ဖြိုးစေဖို့ ထောက်ကူပေးနိုင်ပါတယ်။ ဒီအာဟာရဓာတ်ကို ကလေးအတွက်ပဲ လိုတာတော့ မဟုတ်ပါဘူး။ မိခင်ကျန်းမာစေဖို့လည်း လိုအပ်ပါတယ်။ အထူးသဖြင့် ကျောက်ကပ် ကျန်းမာစေဖို့နဲ့ သားအိမ် ကျန်းမာစေဖို့ပေါ့။
Choline ကို ဥအမျိုးမျိုး၊ ဆယ်လ်မွန်ငါး၊ အနီရောင်အသား၊ ကြက်သား၊ ဘဲသား စတာတွေကနေ ရရှိနိုင်သလို အသီးအရွက်တွေ အနေနဲ့ ပဲအမျိုးမျိုး၊ အခွံမာသီးတွေ၊ အစေ့အဆန်၊ ပန်းဂေါ်ဖီ၊ ပန်းဂေါ်ဖီစိမ်း၊ ဂေါ်ဖီထုတ် စတာတွေကနေ ရရှိနိုင်ပါတယ်။
- သံဓာတ် စုပ်ယူနိုင်စေဖို့ ထောက်ကူပေးလို့
ကိုယ်ဝန်ဆောင်ချိန်မှာ သံဓာတ် နဲ့ ဗီတာမင် စီ ပြည့်ဝဖို့ကလည်း အတော်လေး အရေးပါပါတယ်။ အကြောင်းကတော့ ကိုယ်ဝန်ဆေင်ချိန်မှာ ကိုယ်တွင်းမှာ သွေးပမာဏ တိုးလာတဲ့အတွက် သံဓာတ် လိုအပ်ချက်က ပိုများလာမှာပါ။ ဒီလို အချိန်မှာ ခန္ဓာကိုယ်က သံဓာတ်ကို ပြည့်ပြည့်ဝဝ စုပ်ယူနိုင်စေဖို့အတွက် ဗီတာမင် စီကို များများလေး စားသုံးပေးဖို့ လိုပါမယ်။
ဒီတော့ ကိုယ်ဝန်ဆောင်ချိန်မှာ သံဓာတ်စုပ်ယူမှု ကောင်းစေဖို့ဆိုရင် ပဲအမျိုးမျိုး၊ ပဲနီလေး၊ နှံစားသီးနှံတွေ၊ အစိမ်းရောင် ဟင်းသီးဟင်းရွက်တွေကို စားပေးဖို့ လိုပါမယ်။
ကိုယ်ဝန်ဆောင်ချိန်မှာ အစိမ်းရောင် ဟင်းသီးဟင်းရွက်တွေကို စားပေးတာက ကလေးကြီးထွား ဖွံ့ဖြိုးစေဖို့ ထောက်ကူပေးသလို မိခင်ရဲ့ ကိုယ်အလေးချိန် မတက်စေဖို့နဲ့ သွေးတွင်းအဆီ မများစေဖို့၊ သွေးတိုး၊ ဆီးချို စတာတွေ ခံစားရနိုင်ခြေကိုလည်း လျှော့ချပေးနိုင်ပါတယ်။
ဒီနေရာမှာ တစ်ခု သတိထားရမှာက ကိုယ်ဝန်ဆောင်ချိန်မှာ အစိမ်းရောင် ဟင်းသီးဟင်းရွက်တွေကို စားပါဆိုတိုင်း အပြင်က ချက်ပြုတ်ထားတာမျိုးတွေကို စားတာ၊ အသင့်စားတွေ၊ သေချာ ကျက်အောင် မချက်ထားတာတွေ၊ အေးခဲထားတာမျိုးတွေကို မစားမိဖို့တော့ လိုပါမယ်။
မွန်မွန်